នាយករដ្ឋមន្ត្រី បញ្ជាឲ្យរដ្ឋបាលថ្នាក់ក្រោមជាតិបង្កើតភាពងាយស្រួលដល់ពលរដ្ឋដែលទៅទទួលសេវាសាធារណៈ
កំពង់ស្ពឺ៖ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានបញ្ជាទៅរដ្ឋបាលរាជធានី-ខេត្ត ទាំងអស់ត្រូវផ្ដល់សេវាសាធារណៈដែលល្អបំផុតទៅដល់ប្រជាពលរដ្ឋ និងមិនត្រូវបង្កើតភាពស្មុគស្មាញ ឬបន្ទុកដល់ប្រជាពលរដ្ឋនោះទេ។
ថ្លែងក្នុងពិធីសម្ពោធឱ្យប្រើប្រាស់ជាផ្លូវការអគាររដ្ឋបាលខេត្តកំពង់ស្ពឺនៅព្រឹកថ្ងៃចន្ទ ទី៣០ ខែតុលា ឆ្នាំ២០២៣នេះ សម្ដេចធិបតី ហ៊ុន ម៉ាណែត បានថ្លែងថា បញ្ជាទៅរដ្ឋបាលថ្នាក់ក្រោមជាតិទាំងអស់ ត្រូវពង្រឹងភាពស្អាតស្អំរបស់ខ្លួន ជាពិសេសមិនត្រូវរំលោភអំណាចដែលធ្វើឲ្យប៉ះពាល់ទៅដល់ប្រយោជន៍របស់ប្រជាពលរដ្ឋនៅទេ។
សម្ដេចបានបន្ថែមថា៖ «រដ្ឋបាលរាជធានី-ខេត្ត ត្រូវផ្ដល់សេវាសាធារណៈល្អបំផុតទៅដល់ប្រជាពលរដ្ឋ មិនត្រូវបង្កើតភាពស្មុគស្មាញនិងបន្ទុកដល់ប្រជាពលរដ្ឋនោះទេ»។
សម្ដេចក៏បានព្រមានចាត់វិធានការលើរដ្ឋបាលរាជធានីខេត្តដែលបានរំលោភអំណាចរដ្ឋបាលផងដែរ៕
